Upington… dit was Boet du Plessis se dorp. Hy het ‘n ontwrikbare vertroue in Upington en sy mense gehad, Toe hy in 1964 op Upington begin bou het, was daar nie sprake van ‘n industriële gebied nie. Die Spilhaus gebou (waar Kaap Agri vandag is) was so aan die  kant van die dorp dat Cafe Royal wat ‘n koeldrank fabriek gehad het, nie kans gesien het om ‘n koeldrank yskas aan hom te verhuur nie, want wie sou dan nou dáár koeldrank koop. Die Spilhaus gebou het Boet du Plessis op versoek van die Spilhaus Groep vir hulle gebou terwyl hy as bestuurder vir hulle werksaam was. Met moeite, teenkanting en baie angs het hy alleen die geld bymekaar geskraap om die  kompleks met werkswinkel, kafee en petrolstasie te bou. Die werkswinkel het hy aan Spilhaus verhuur, Frank’s Cafe aan ‘n ander persoon en die petrolstasie het hy self hanteer. 

​

Michael Marius du Plessis is op 25 Februarie 1930 in Kenhardt gebore. Hy was alom bekend as Boet. As oudste seun van drie kinders moes hy op 16 jarige ouderdom die skool verlaat om te help verdien. Met standerd 7 agter sy naam begin hy in ‘n winkel in Upington  vir ₤10 per maand werk. 1949 het ‘n vriend van hom, Floors Eigelaar (jonger broer van Johnnie Eigelaar), vir hom ‘n werk in ‘n winkel in Velddrift vir ₤20 per maand gekry. Met die rykdom koop hy ‘n koei en verkoop plaaslik die botter en melk. Entrepeneur wat hy was, besit hy later drie koeie.

 

Teen 1952 keer hy na Upington terug en begin by Spilhaus werk. Sy eerlikheid, deursettingsvermoeë en sy vermoeë om potensiaal raak te sien het nie ongesiens verby gegaan nie. 

 

3 Januarie 1959 trou hy met Helene le Riche, ‘n Engelssprekende meisie van die Kaap. Sy het ‘n graad in geologie gehad. Met haar sagte en kalme geaardheid ondersteun sy hom om matriek te voltooi. Uit die huwelik word vier seuns gebore.